1997 онд Сингапур боловсролын системийнхээ ирээдүйн чиглэлийг “Thinking Schools, Learning Nation” буюу “Сэтгэдэг сургууль, суралцдаг үндэстэн” гэсэн санаагаар тодорхойлсон. Тухайн үед Сингапур улсын удирдагчид "Ирээдүйд бид хүүхдүүдэд бүх хариултыг зааж чадахгүй. Харин ирээдүйд тулгарах асуудлыг өөрсдөө таньж, шийдэж чаддаг хүмүүсийг бэлтгэх ёстой." хэмээх хэлэлцсэн. Тэдний энэхүү дэвшүүлсэн санаа нь бүх хариултыг хүүхдэд урьдчилан өгөх бус, шинэ нөхцөлд өөрөө суралцаж, бодож, асуудал шийдэж чаддаг хүн болгон хөгжүүлэх явдал байв.
Thinking Schools гэдэг нь зөвхөн “сэтгэлгээний хичээл ордог сургууль” гэсэн үг биш. Харин хүүхэд асуулт асууж, таамаглалыг сорьж, мэдээллийг эргэцүүлэн үнэлж, өөр өөр өнцгөөс харж, шинэ санаа гаргаж, шийдлээ туршиж үздэг сэтгэх соёлтой сургалтын орчин гэсэн ойлголт юм. Үүнд багш ч мөн адил чухал үүрэгтэй. Багш бүх хариултыг өгөхөөс илүү хүүхдийг зөв асуултаар чиглүүлж, өөрөө бодож олох боломжийг бий болгоно. Ингэснээр “суралцах” нь зөв хариулт цээжлэх үйл явц биш, харин бодох, судлах, турших, эргэцүүлэх үйл явц болно.
Харин Learning Nation нь энэ үзлийг сургуулийн хүрээнээс давуулан бүхэл бүтэн нийгэмд авч үзсэн ойлголт. Өөрөөр хэлбэл, зөвхөн хүүхэд биш, багш, эцэг эх, байгууллага, ажилтан, удирдагч, иргэн бүр тасралтгүй суралцдаг нийгэм бий болгох тухай юм. Сургууль төгсөөд суралцах үйл явц дуусахгүй. Шинэ мэдлэг бий болж, технологи өөрчлөгдөж, шинэ асуудлууд гарч ирэхийн хэрээр хүн өөрийгөө байнга хөгжүүлж, шинэ зүйл сурах шаардлагатай. Тиймээс Thinking School нь сэтгэж сурах үндэс суурийг бий болгож, Learning Nation нь насан туршдаа суралцдаг соёлыг бий болгоно.
Энэ санаа өнөөдөр бүр ч илүү хамааралтай болсон. Учир нь бидний амьдарч буй дэлхий маш хурдан өөрчлөгдөж, хиймэл оюун ухаан хүртэл мэдээлэл хайж, хариулт гаргаж, санаа боловсруулах боломжтой болсон. Тиймээс хүүхдийн үнэ цэн зөвхөн “юу мэддэг вэ?” гэдгээр бус, “мэдэхгүй зүйлтэйгээ хэрхэн ажилладаг вэ?”, “мэдээллийг хэрхэн үнэлдэг вэ?”, “өөр өнцгөөс хэрхэн хардаг вэ?”, “шинэ нөхцөлд хэрхэн дасан зохицдог вэ?” гэдгээр улам бүр тодорхойлогдоно.
Тиймээс сэтгэлгээ бол нэг удаа заагаад дуусдаг мэдлэг биш, байнга ашиглаж, дадлагажуулж, эргэцүүлж байж хөгждөг ур чадвар юм. Хүүхдэд бүх хариултыг заах боломжгүй ч ямар ч шинэ асуулттай тулгарсан үедээ бодож, суралцаж, шийдэл хайх чадварыг хөгжүүлж болно.
Манай Hasui Thinking Academy-ийн бүтэн жилийн сэтгэлгээний хөтөлбөрийн зорилго ч үүнтэй адил. Бид хүүхдэд зөвхөн “зөв хариулт” олоход бус, хэрхэн бодох, асуулт тавих, мэдээллийг үнэлэх, асуудлыг олон өнцгөөс харах, шинэ санаа гаргах, шийдлээ турших, өөрийн сэтгэлгээг эргэцүүлэх дадлыг системтэй хөгжүүлэхэд анхаардаг.
Учир нь бидний зорилго бүхнийг мэддэг хүүхэд бэлтгэх биш. Харин мэдэхгүй зүйлтэйгээ ажиллаж чаддаг, өөрөө суралцаж чаддаг, өөрийнхөөрөө сэтгэж чаддаг хүн төлөвшүүлэх юм.
Thinking School → Learning Nation
Сэтгэж чаддаг хүүхдүүдээс суралцаж чаддаг нийгэм бий болно.
